Son as 7:30 da maña do mércores 20 de decembro de 2006, estamos a 20 millas ao oeste de Monte Louro. Anda un ventiño fresco de leste o que me obriga a manter as fiestras da ponte pechadas para non mollar a cara.
Teño sono , estou canso e un pouco malhumorado.
¡E fai un frío que pela.!
Acabamos agora mesmo de largar os artes, e aproveito para tomar un cafeíño ben quente para quecer o corpo.
Miro no radar e non temos barco ningún nun radio de 4 millas , podo tomar tranquilo o café.
Acendo o UHF no canle 74 e saúdame unha voz augardentosa pero ben afinada cantando unha panxoliña que fala do Neno sobre un feixe de pallas . Cambio para a canle 9 e outra voz , esta vez moi desafinada , canta tamén unha panxoliña que fala de peixes e de ríos. Cando termina outra voz e outra panxoliña remúdano .
Paso agora a canle 11 onde esta control de trafico de Fisterra , e un petroleiro de bandeira Grega está a reportar o seu paso polo dispositivo de separación de trafico; O terminar despídese con un recoñecible, Merry chistmas and happy New year.
Volvo o canle 74 , sigue a mesma voz de augardente cantando, pero esta vez é unha rancheira o que soa través das ondas. Cando termina outras voces anímano a continuar e a voz augardentosa arrancase con un pasodobre.
Xa son mais das 8 da maña , xa espertei , xa quecín e xa non me lembro porque estaba malhumorado.

BO NADAL