Este sábado pasado tivo lugar no salón de actos da Casa da Cultura de Muros a presentación do libro de D. Domingo Guerra París "ACTIVIDAD ECONÓMICA MURADANA" (Una Vision Subjetiva) .
O acto foi un completo éxito, coa asistencia de arredor de duascentas persoas que ateigaban o local, tendo algún dos presentes que aturar a incomodidade de estar de pe durante a súa celebración.
Dou a benvida os asistentes ó acto o autor do libro, para logo intervir D.Francisco Abeijón Núñez que foi quen me dou paso a min, para logo rematar intervindo D. Pedro Martínez Formoso.
O acto foi pechado por Domingo que fixo unha pequena escolma dos apartados do libro para logo pasar a firma dos exemplares.
Poño aquí as miñas verbas na espera de que Pacucho, Pedro e Domin me fagan chegar as suas para tamen colgalas.
Estimado auditorio:
Seguro que mais de un de vos estádesvos a preguntar que é o que fai aquí nesta mesa un mariñeiro presentando un libro titulado “ACTIVIDAD ECONÓMICA MURADANA”, un libro sobre economía! Conste que eu tamén mo preguntei algunha vez antes de ler o libro.
E aparte do obvio, que é a amizade que me une co autor; O que me impulsa e motiva a estar hoxe aquí, é que esta obra abrangue e fala de algo que a todos os veciños nos interesa, ou debería interesar de algún modo, que é a actividade económica do noso concello, as contas de Muros, vamos!.
Domingo, como bo economista que é, fai un repaso polos grandes números do municipio desta ultima década, pero utilizando sempre unha linguaxe sinxela e uns termos aptos e “asequibles” incluso, para os que coma min, están berrados dende sempre cos números.
Pero esta obra non está escrita única i exclusivamente pola man e coa mirada dun experto en economía, nin centrada tan so na fría obxectividade das cifras, senón que tamén está feita dende o corazón dun muradán que o é, e que se gaba de selo.
Pero o amor pola vila nunca debe nin pode ofuscar a nosa razón, nin agochar o noso entendemento, e Domingo, amósanos unha realidade ben tanxible, medible e “cuantificable”... que é mais ben deprimente, e que empurra negativamente a vida económica de Muros. Coa axuda dos incontestables datos que aporta, podemos apreciar a desalentadora curva descendente económica e demográfica que lastra ó noso concello nestes últimos anos. Envellecemento da veciñanza, falta de relevo xeracional , emigración, paro... Estes son algúns dos problemas máis evidentes e “acuciantes” que nos afectan atenazando o despegue económico da comarca muradana.
Somos un concello en recesión, e este traballo que agora aquí presentamos, axúdanos a entender as claves do porqué aportando tamén algunha idea para tratar de remedialo.
Leo literalmente un paragrafo do libro. “Muros es un municipio dotado de un enorme potencial para que el turismo de ocio se convierta en una de sus principales fuentes de ingreso. Pero es necesario que se desarrollen estrategias adecuadas para obtener la máxima rentabilidad posible y, al mismo tiempo, es fundamental que estas actuaciones sean compatibles con mejoras de la calidad de vida de los habitantes...”
Muros non é un concello industrial, e salvo honrosas excepcións, non posúe un tecido produtivo con capacidade para acoller a man de obra cada vez mais cualificada da nosa mocidade, de maneira que, os nosos fillos, logo de realizados os seus estudos, teñen case obrigatoriamente que buscar traballo en outros lugares censándose en outros concellos e polo tanto restando xuventude e vitalidade o noso .
Pero Muros ten infinidade de cousas polas que devecerían moitos concellos; E aparte das nosas magnificas praias que atraen o turismo estacional, temos moitas outras que ofertar, que sendo potenciadas de modo adecuado poderían aportar os ingresos de un turismo que non só busque sol e praia, porque este, tan só cubre escasamente dous meses do ano.
Sexamos realistas, e centrémonos nos aspectos onde Muros pode competir e medrar; Temos historia, temos paisaxe, temos arte, temos mar, temos unha vila como hai poucas que conserva un cada vez mais coidado casco histórico único en toda Galicia. Temos tradicións centenarias que de seguro interesarían a moitos forasteiros... se as coñecesen; Posuímos unha ría fermosísima e moi axeitada para calquera actividade náutico-deportiva, pero todo isto hai que amosarllo ó mundo, e iso lógrase con intelixencia, anticipación, traballo e sobre todo con promoción. Isto último é o que fai Domingo coa súa obra, traballar e promocionar dende a ollada particular do seu ámbito profesional ó concello de Muros.
Pero... e sigo lendo do libro: “La experiencia demuestra que no es suficiente contar con recursos turísticos singulares, sino que es necesario, además, entender que es una labor que se desarrolla en sociedad”
Por iso, ante todo e sobre todo, o maior e mellor activo que ten Muros é a súa xente, porque somos nós, cada un dentro da medida das nosas posibilidades, os que temos que tratar de sacar adiante o noso concello, para que sexa un lugar onde as novas xeracións de muradáns podan vivir orgullosos do que son e do que teñen.
Domingo, dende as páxinas deste libro, tamén nos pon en garda , e fainos reflexionar contra esa costume “autocompracente” da que abusamos moitos de nós, e que non é (seino), a mellor maneira nin a mais obxectiva de ver a realidade do noso concello. Tamén aporta o seu punto de vista crítico que quizais nos axude ós que somos uns cegos namorados de Muros a saír do noso inconsciente idilio, que non é mais que un amor platónico que nos aboca erroneamente a pensar que a nosa Vila, que o noso Concello, é o mellor do mundo. E pon o punto necesario de pementa que se contrapón a melaza do noso habitual discurso, porque quizais iso sexa precisamente o que nos fai falta os muradáns para espertar do noso letargo, da nosa longa noite de pedra que nos mantén adurmiñados e que nos envía directamente ao inferno que necesariamente temos que padecer os conformistas.
E xa para rematar, quéroche dar as grazas Domin , grazas amigo, grazas por aportar o teu grao de area a prol de Muros. Porque aínda a praia máis enorme nunca existiría se non a dera comezo un primeiro grao, nin o camiño máis tortuoso se andaría se nunca se dera un primeiro paso.
Moitas grazas
Manuel Martínez Caamaño
UNHA HONRA E UN PLACER
Para mín estar hoxe aquí neste acto supónme un doble sentimento de honra e de placer. Por unha banda significa unha honra honra que pensaran en mín para presentar o libro de un muradán exemplar como é o amigo Domin. Ocórrenseme varias persoas máis cualificadas que mín para estar sentadas nesta mesa. E polo tanto un motivo de satisfación persoal estar nesta presentación dun libro sobre Muros, sobre o meu concello.
Pero para mín tamén este acto tamén significa un placer. Supónme unha enorme alegría estar aquí compartindo mesa con uns bos amigos. Quixera mencionar especialmente a Domin que foi un magnífico compañeiro cando eu empezaba a traballar nas oficinas municipais de Muros. Recordarei sempre aquel tempo que compartimos antes de que el conseguira o seu posto de traballo no Consello de Contas en Santiago. A min impresionoume a súa profesionalidade e o tesón co que compaxinaba o traballo cos seus estudios de economía na universidade de Santiago. Tiven a sorte de coñecer a súa familia e iniciamos unha amistade que perdura e da que me sinto moi orgulloso. Polo tanto para mín tamén é un placer estar aquí rodeado destes bos amigos.
O libro que hoxe presentamos penso que é unha valiosa ferramenta para entender o concello de Muros. Trátase dunha obra que ten a virtude de explicar, de axudar a entender as cousas. E para entender ben as cousas non hai nada que axude máis que unha sinxela e clara exposición.
Porque os estudios económicos non resultan moi sinxelos de entender. A economía non é unha ciencia unicamente deductiva como son as matemáticas. Nas que partindo duns postulados establecidos a priori vanse deducindo as consecuencias deses postulados. E tampouco pode ser unha ciencia puramente inductiva. Non se pode limitar a inferir hipóteses a partir dos feitos. Os estudios económicos teñen que conxugar as dúas, a deducción e a inducción. Pero ademais as teorías económicas precisan da contrastación. As teorías económicas teñen que superar a proba dos feitos. Porque ao cabo son os feitos os que van a confirmar ou rexeitar estas teorías.
A economía para os profanos ás veces parécese a un desfile de enigmas, de problemas e de dificiles dilemas. Sen embargo hai conceptos que resultan fundamentais non solo para os estudiosos senón que están presentes para toda a sociedade. Conceptos como a escasez, a eficiencia, as ganancias derivadas da especialización ou o principio da vantaxe comparativa en Microeconomía. Ou os conceptos de oferta e demanda agregadas en Macroeconomía. Son conceptos que non nos resultan estraños e dos que escoitamos falar diariamente nos medios de comunicación.
Como todos os científicos os economistas din que se estudia a súa ciencia para comprender o mundo que nos rodea. Pero a economía ten outra virtude, tamén axuda a deseñar as políticas económicas dos estados. Basándose nunha serie de principios e de teorías, co obxectivo de mellorar o nivel de vida da poboación do país e do resto do mundo.
Para os que non somos expertos nesta materia a clave consiste consiste en presentar a economía dun xeito claro e sinxelo. Cando nos dispoñamos a abrir este libro, cada un de nós temos uns coñecementos diferentes e con ideas preconcebidas de cómo se desenvolve a actividade económica neste concello. Penso que o papel que persigue o escritor con esta obra non é tanto mudar valores do lector como axudarlle a comprender certos principios económicos que son imperedeceiros. Para ser capaces despois de aplicalos e facer de Muros un lugar mellor para eles, para as súas familias e para toda a comunidade.
Gracias.
Para mín foi unha pena non poder asistir a este acto. Como dí Pacucho Domin foi un magnífico compañeiro cando eu empezaba a traballar no concello de Muros. Lembro o día que me enseñou o arquivo municipal e a biblioteca, donde eu exercería o meu traballo, e Domin sempre animándome. Domin grazas por todo !